Act 19 | NdeIBE | STEP | Kwathi u-Apholo eseKhorinte uPhawuli wathatha indlela ehamba phakathi kwelizwe waze wayafika e-Efesu. Khonapho wafumana abafundi abathile

Acts 19

UPhawuli E-Efesu

1 Kwathi u-Apholo eseKhorinte uPhawuli wathatha indlela ehamba phakathi kwelizwe waze wayafika e-Efesu. Khonapho wafumana abafundi abathile 2 wababuza wathi, “Lamamukela na uMoya oNgcwele ngesikhathi liqalisa ukukholwa?” Baphendula bathi, “Hatshi, kasizwanga lokuzwa ukuthi kuloMoya oNgcwele.”

3 Yikho uPhawuli wasebuza wathi, “Pho labhaphathizwa ngamkhuba bani?” Baphendula bathi, “Ngobhaphathizo lukaJohane.”

4 UPhawuli wathi, “Ubhaphathizo lukaJohane lwalulubhaphathizo lokuphenduka. Watshela abantu ukuthi bakholwe kulowo owayezakuza ngemva kwakhe, esitsho ukuthi kuJesu.”

5 Sebekuzwile lokhu babhaphathizelwa ebizweni leNkosi uJesu. 6 UPhawuli esebeke izandla zakhe phezu kwabo uMoya oNgcwele wehlela kubo, bakhuluma ngezindimi njalo baphrofetha.

7 Babe ngamadoda ayengaba litshumi lambili bebonke.

8 UPhawuli wangena esinagogeni wakhuluma ngesibindi khona okwezinyanga ezintathu, echaza okusuthisayo ngombuso kaNkulunkulu.

9 Kodwa abanye babo baba yiziqholo; bala ukukholwa bakhuluma kubi obala ngeNdlela. UPhawuli wasebatshiya bodwa. Wathatha abafundi wasuka wayahlangana labo baxoxisana nsuku zonke esikolweni sikaThiranu.

10 Lokhu kwaqhubeka okweminyaka emibili kwazekwathi wonke amaJuda lamaGiriki ayehlala kulesosifunda sase-Asiya alizwa ilizwi leNkosi.

11 UNkulunkulu wenza imimangaliso engajayelekanga ngoPhawuli. 12 Izifinyo lamathawulo okwakuthintiswe yena kwakusiwa kwabagulayo bahle basile emikhuhlaneni yabo lemimoya emibi iphume kubo.

13 Abanye abaJuda ababebhoda bexotsha imimoya emibi bazama ukubiza ibizo leNkosi uJesu kulabo ababekhwelwe ngamadimoni. Babesithi, “Ngebizo likaJesu uPhawuli atshumayela ngaye, ngikulaya ukuthi uphume.”

14 Ababesenza lokhu ngamadodana ayisikhombisa kaSkeva umphristi omkhulu wabaJuda. 15 Umoya omubi waphendula wathi, “UJesu ngiyamazi, loPhawuli ngiyamazi, kodwa lina lingobani na?” 16 Kwasekusithi indoda eyayilomoya omubi yabeqela yabehlula bonke. Yabatshaya okuzwayo baze baphuma endlini bebaleka benqunu njalo besopha igazi.

17 Kwathi lokhu sekuzwakele kumaJuda lamaGiriki ababehlala e-Efesu, bonke bethuka ngokwesaba, yikho ibizo leNkosi uJesu lahlonitshwa kakhulu. 18 Abanengi balabo abasebekholwa beza baphumela egcekeni bevuma iziphambeko zabo. 19 Abanengi ababehlahlula baletha ndawonye izincwadimgoqwa zabo bazitshisa obala. Bathi sebehlolile izindleko zalezozincwadimgoqwa kwabonakala kungaba ngamadrakhima ayizinkulungwane ezingamatshumi amahlanu.

20 Ngaleyondlela ilizwi leNkosi landa kabanzi njalo lakhula laba lamandla.

21 Ngemuva kwakho konke lokhu sekwenzakele, uPhawuli wazimisela ukuya eJerusalema, ezadlula eMakhedoniya lase-Akhaya. Wathi, “Nxa sengike ngaya khona, kuzamele ngethekelele eRoma lakho.”

22 Wathuma ababili abasizi bakhe eMakhedoniya, uThimothi lo-Erastu, yena esasele okwesikhatshana esifundeni sase-Asiya.

Isiyaluyalu E-Efesu

23 Kusona lesi isikhathi kwaba lokudungeka okukhulu ngeNdlela. 24 Umkhandi wesiliva owayethiwa nguDemetriyu owayesenza amathempelana amancane ngesiliva awokukhonzela u-Arithemisi, wayengenisa imali ezwayo kubakhandi. 25 Wababiza ndawonye, kanye lezinye izisebenzi zemisebenzi efananayo wathi kubo: “Madoda, liyakwazi ukuthi sizuza imali enengi ngomsebenzi lo. 26 Liyabona njalo liyezwa ukuthi umuntu lo, uPhawuli usenze abantu abanengi bakholwa njalo uzabalahlekisa lapha e-Efesu njalo lakuso sonke isifunda sase-Asiya. Uthi yena onkulunkulu ababunjwe ngumuntu kabasibo onkulunkulu lakancinyane.

27 Kulengozi-ke yokuthi kakukuba ngumsebenzi wethu kuphela ozalahlekelwa libizo lawo elihle, kodwa lethempeli likankulunkulukazi omkhulu, u-Arithemisi lizadunyazwa, laye unkulunkulukazi ngokwakhe, yena okhonzwa kusosonke isifunda sase-Asiya lasemhlabeni wonke, uzaphucwa ubukhosi bakhe.”

28 Bathi bekuzwa lokhu bafuthelana ngokuzonda, bahle bamemeza besithi: “Mkhulu u-Arithemisi wama-Efesu!” 29 Masinyane nje idolobho lonke layaluzela. Abantu badumela uGayu lo-Aristakhu, ababe ngabaphelekezeli bakaPhawuli abaseMakhedoniya, babahudulela enkundleni yemidlalo bonke bayakuthi cwi khona. 30 UPhawuli wayefuna ukuzithela emphakathini kodwa abafundi bamalela.

31 Labanye abaphathi besifunda, ababe ngabangane bakaPhawuli, labo bamthumela ilizwi bathi angaqali ayovela enkundleni yokudlalela.

32 Kwakungasaqondakali enkundleni: Abanye babeklabalala besitsho lokhu, abanye labo besitsho okunye. Abantu abanengi babevele bengazi lokuthi konje babelandeni lapho. 33 AbaJuda bafuqela u-Alekizanda phambili besithi kabakhulumele. Waphakamisa isandla ukubathulisa ukuze achasise kuhle indaba ebantwini. 34 Kodwa bathi ngokunanzelela ukuthi wayengumJuda, bonke bahlaba umkhosi kanyekanye okwaphose kwathatha amahora amabili, besithi: “Mkhulu u-Arithemisi wama-Efesu!”

35 Unobhala wedolobho walithulisa ixuku wathi: “Madoda ase-Efesu akusikho yini ukuthi umhlaba wonke uyakwazi ukuthi idolobho lase-Efesu yilo elingumlondolozi wethempeli lika-Arithemisi omkhulu, kanye lesifanekiso sakhe esehla sivela ezulwini? 36 Pho-ke njengoba lokhu kuyinto engaphikiswayo, thulani lingenzi izinto zamawala. 37 Selilethe amadoda la lapha kodwa wona engagqekezanga emathempelini kumbe athuka unkulunkulukazi wethu. 38 Yikho nxa uDemetriyu lalabo akhanda labo belensolo loba ngobani, imithethwandaba ivuliwe, njalo labehluleli bakhona. Bangaliphanyeka icala.

39 Aluba kukhona njalo okunye elifuna ukukutsho, kakuyothoniswa ngomthetho enkundleni. 40 Njengoba kunje nje sisengozini yokubekwa icala lokuvusa isiyaluyalu ngenxa yezenzakalo zalamuhla. Kungenzeka lokho sizakwehluleka ukuchaza imbangela yalesisiphithiphithi, ngoba ngempela kungekho sizatho.” 41 Esekutshilo lokhu wayichitha inhlanganiso.